قصيدة ((الصور والذكريات)) بقلم عباس الهلالي

قصيدة ((الصور والذكريات))

بقلم عباس الهلالي

صفنت عله الصور مو عين دمعات

ورديت اليبس بالذكرى أخضر

صحت مشتاك لآخر صور بلبوم 

وصرت مابين صورة وصورة اعثر

ومن ضميتهن بالحضن حسيت 

 الصور ماتحجي بس مشتاكه أكثر

االصور مو الا فوتوغراف بلبوم 

المواقف صور أعظم بيها وأكبر

والي وي البقوا بس صور بالبال

احلى الذكريات بأحلى منظر

وذا اريد احجي عنها عمر ينراد

عمر فوك العمر ويجوز اخسر

الصور والذكريات تهز حياطين

من بيها نرد بالشوف نكصر 

عفت كلشي المهم مشتاك مشتاك

انا مضيع الطين الحري الاسمر

متاني بلايه موعد غلطة اكلوب

السجج نامت وانا الباقي أسهر

الملح ذيج الملامح كلبي عطشان

بهواهم والعطر مشتاك أسكر

مايدرون فاكد عافيه وروح

مايدرون باقي بوجه الأصفر

من راحو لهسه وانا مخنوك

وحسرة أبين كل اضلوعي تفتر

ها باجر يجون وها يظلون

ها باقي الوقت ها لا تأخر

وعلى عالحال حال يذبها عالحال

مو ايدي الكمش خاصرتي خنجر

وسيف الاخ عابر صدري للريج

بكل جلمة احسه يحزلي منحر

دوت بيه الهريجة بكل الاكتار

ولا حن الحنيني بلحظة عنبر

لا عندي جدم لا كلب لا عين 

ادور وين عنهم ومشي مضطر 

كلشي بوجهي سد الباب مليت 

وبس حزني عليه بوجهي أشر 

لحد ماكام تعبي بغيري ينشاف 

أو وصل مية ضهر وأكثر تطور 

حرب نفسية عايش وانا مصيوب 

عبر بيه الوجع كل خطر الأحمر

ولا بينوا أهل الصور لليوم 

الصبر مولاي يا موسى ابن جعفر