اگو گاله بقلم علي خليفة /ميسان

اگو گاله 

علي خليفة /ميسان

اگو گاله 

وكو اباله حچي مضموم ما گاله ،

فض غيظه ورجع مهموم 

وحده وعايف خياله 

بس لا مات 

لااااا بس ليموت يگول 

ماظن هيج غفلة وينشده باله 

بس گالوا لگوه مكتول 

ولگوه بين الگصب والهور طول بطول 

وشاعت بالسلف ونعرف چتاله ،،،

وردت ناس تنشد ناس

ناس تنشد ناس 

عطوة براية العباس 

لگوة بين الگصب ..

والهور كله اغتاظ

جناية فشگ والدم صعد للراس ، 

واسمع صاحت النسوان 

محزم بالشر ردنا نزامط بيه 

هد حيلي بچي النسوان 

عدنا زلم تاخذ بثارك 

وبزمورهن كلنا نتبارك 

مريود هالليلة نتعارك .. 

ونسوي كلشي لحرمه الله .. 

وشما يجي من الله انعمالله .. ،،

واظن شم العمارة وهد 

يگول الطين اعرفه ما يگل لحد 

هنا چادر يوّن وام وعراضة وخيل 

وزمور التفگ ما تنحرز بالليل 

بس خاف الزلم تبرد ! 

وانا گلبي بخس حالة 

مضيف بلا بخت ومكسرة دلالة 

ومن كل كتر طاح اهطار 

ولك يا بخت يا خطار 

ذكرت الغزل والفالة ، 

وعگب حچي التفگ 

غم الحچي المگيول 

اهي مغبرة اللحايا وطومرت بالچول 

ومن خزرة عيونه انعرف چتاله ، ،،،

وبعد بيه بچي وغروب 

وبيه عيون عاشگ وشلت عالبوب 

وما صح واحد احچيلة 

وانا ادري به حچي العشاگ لو ظل بالگلب چيلة 

وليا وكت وشچندوب 

الحچي ظل بالجرف مصلوب 

اريد احظى بجرف مو هذا واشچيله ،،،

وانا شبيدي 

شيفيد الخوف 

عشت بعيونكم ليلة وبعد ما اشوف 

اريد انسى السمچ وانكر طراريدي 

واشم الجلعة من كل صوب .. 

بالجلعة الهوى مخنوگ 

شچم حلم بحلم مخنوگ

امر فوگ الجسر مرتين 

رجعت منين ما لمنا وبعدنا الطين 

كتبتلكم رسالة وما لگيت ايدي